Bilboko Portua eta Itsasadarra Fundazioak ibaiertzeko udalerrietako jarduera-programa onartu du

Bilboko Portua eta Itsasadarra Fundazioak —interes orokorreko planak eta jarduerak sustatzeko sortua— aurtengo urterako Jarduera Plana eta babestuko eta diruz lagunduko dituen proiektuak onartu ditu.

Bilboko Portuko Agintaritzako ordezkariek eta ibaiertzeko bederatzi udalerrik (Barakaldo, Bilbo, Erandio, Getxo, Leioa, Portugalete, Santurtzi, Sestao eta Zierbena) osatzen dute fundazioa.

Proiektu hauek lagunduko ditu diruz fundazioak, patronatuko kideek hala proposatuta:

• Barakaldon. Ibilbide gidatuak, historikoak eta ingurumen-alorrekoak, itsasadarreko industriaren iragana eta oraina (eta udalerria bera) ezagutzeko. Ezagutu Barakaldo ekimenekoa da proiektu hori, Udalak eta Eusko Jaurlaritzako Hezkuntza Sailak sustatua eta Ortzadar enpresak antolatua. Besteak beste, hau eskaintzen du: zeharkaldi bat, itsasontziz, Barakaldoko industria-eremua ikusteko, Kadagua ibaiaren bokaletik hasi eta Nerbioiren bokaleraino, Abrako badian. 

• Bilbon. Stand up paddle (SUP) modalitatearen erabilera eta praktika, eta Bwaters kirol-taldeak SUP-eskola bat sortzea. Halaber, arrauna ezagutzea eta praktikatzea, eta, horretarako, Deustu arraun-elkarteak arraunean hasteko eskola bat martxan jartzea. Bi proposamen horien xedea da Bilboko Itsasadarra sustatzea eta dinamizatzea, han egiteko egokiak diren bi kirol-jardueraren bidez.

• Erandion. Piraguak uzteko doako zerbitzua, RKAbenturak eskainia, Erandioko kaian.

• Getxon. Espainiako Laser Erradialeko Txapelketa, Real Club Marítimo del Abra-Real Sporting Club elkarteak antolatua; eta Areetako Bandera estropada eta ARC2 traineru-liga, Raspas del Embarcadero arraun-elkarteak antolatua.