Porturako sarbideaAsteartean, apirilaren 12an, bi gurutzaontzi ikusgarrik inauguratuko dute aurten Euskadiko gurutzaldi-denboraldia. Bilboko Portuak Getxon dituen instalazioek ongietorria emango diete Transcomak ordezkatutako Princess konpainiako Sky Princessi eta Marmedsak ordezkatutako P&O ontzi-enpresako Britanniari. Bi ontziak Carnival taldekoak dira, 330 metroko luzera dute eta 3.000 bidaiari baino gehiagorentzako lekua dute. Hala ere, ontzi barruko prebentzio-neurri zorrotzak direla eta, bidaiari-kopurua mugatzea espero da.
Sky Princess Arroxelatik goizeko 7:30etan iritsiko da, eta 18:00etan irtengo da Lisboara joateko. Apirilaren 9an abiatu zen Southamptonetik, eta ibilbide osoa honako hau da: Arroxela-Bilbo-Lisboa-Gibraltar-Cádiz-Málaga-Cartagena-Vigo, eta apirilaren 23an itzuliko da Southamptonera.
Bestalde, Britannia, Olatua izeneko itsas estazioa 2017an inauguratu zuena, 8:30ak aldera iritsiko da A Coruñatik, eta 18:00etan aterako da Cherbourgera. Apirilaren 8an abiatu zen Southamptonetik, eta Gijon, Coruña, Bilbo, Cherbourg eta Southamptonera joango da, apirilaren 15ean.
Hauek dira asteartean eskatutako ibilaldi nagusiak: Donostia; Bermeo, Gernika eta Urdaibai; Bilbo eta Guggenheim; Bilboko panoramika Artxandarekin; Artxanda eta hirigune historikoa; eta Arabako Errioxa. Halaber, Portuko Agintaritzak doako shuttle zerbitzua eskaintzen die, aurten ere, txangorik kontratatu ez duten eta Bilbora hurbildu nahi duten turistei. Gainera, Bilboko Portua Euskadira sartzeko atea denez, nahi duten bidaiariak eta tripulazioko kideak Eusko Jaurlaritzak kudeatzen duen turismo-informazioko mostradorera joan ahal izango dira bi Itsas-bidaiarien Terminaletan. Han, sektoreko profesionalen eskutik, informazioa eta laguntza jaso ahal izango dute.
Aurreikuspen bikainak
Apirilean, hamabi gurutzaontzi porturatuko dira, eta abenduan amaitzea espero den denboraldi honetan 25 konpainiatako 70 ontziri baino gehiagori ongietorria ematea aurreikusten da, 111 eta 348 metro bitarteko eskorekin. Hala ere, aurreikuspen horiek aldatu egin daitezke, hala gertatzen baita beti gurutzaontzien sektorean eta aurten, bereziki, dauden ziurgabetasun ekonomiko eta sanitarioetan.
Ekainean eta urrian egun berean hiru gurutzaontzi porturatzea aurreikusten da, eta apirilean, maiatzean, ekainean, abuztuan, irailean eta urrian bi gurutzaontzi hartuko dira behin baino gehiagotan.
Aurten, itsasontzien eta konpainien aniztasuna azpimarratu behar da, zenbait gurutzaontzien lehen geldialdiekin: Carnival Pride, Celebrity Beyond, Le Dumont D’Urville, Magic Disney, MSC Virtuosa edo Norwegian Star. Gainera, Bilboko Portuan ekingo dioten bidaiari-ontziratzeak espero dira udaberrian eta udazkenean.
Eskalak berretsi ahala, Portuko Agintaritzak xehetasun gehiago emango ditu.
Seatrade Cruise Global Miami
Apirilaren 25etik 28ra Seatrade Cruise Global Miami izango da, gurutzaldien munduko ekitaldirik handiena. Bilboko Portuko Agintaritza Bilbao Turismoarekin batera joango da, helmuga sustatzeko eta turismo hori hartzen dituen azpiegiturak ezagutarazteko. Halaber, ekitaldian zehar, Portuko Agintaritza sektoreko enpresekin harremanetan egongo da, horretarako prestatutako standean.
