Porturako sarbideaBilboko portuak Finneco I ontzia hartu du, Grimaldi Taldeak Baltikoko lineetan eta iparraldeko itsasoetan lan egingo duen eta munduko eraginkorrenetakoak bihurtzen duten sektoreko azken teknologiak dituzten Finnlines konpainiaren hiru ontzietako lehena. Honekin, GG5G (Grimaldi Green 5th Generation) motako 5 ontzi daude dagoeneko distantzia laburreko salgaien itsas garraiorako Espainiako lineetan lan egiten, eta horiekin ontzi-enpresak apustu garbia egiten du flota gazte eta oso eraginkor baten alde.
Bilbon egindako lehen geldialdia dela eta, Portuko Agintaritzako Eragiketa, Merkataritza, Logistika eta Estrategia zuzendari Andima Ormaetxek oroitzapenezko metopa eman dio Finneco I.aren kapitainari.
Ice Class multipurpose ro-ro honen edukiera 400 kamioi baliokidea da; hau da, egungo karga-ahalmena baino % 38 gehiago, horretarako emisioak handitu gabe. Eraginkortasun handiago horrekin batera, elektronikoki kontrolatutako azken belaunaldiko motorren ekipamendua eta sufrea eta partikulak murrizteko ihes-gasak arazteko sistema daude.
Modelo honen berritasun nagusien artean, Zero Emission in Port proiektu berritzailea dago. Proiektu horri esker, ontziek martxan dauden motor lagungarriak gelditzen dituzte portuan, eta, beraz, ez dute inguruan emisiorik sortzen. Hori posible da nabigazioan litiozko bateriak kargatzen dituen shaft generators sistemari eta 350 metro koadroko eguzki-panelak instalatzeari esker.
Finneco astean behin iritsiko da Bilbora, eta 24 orduz egongo da portuan, Toro y Belotaza operadorearen terminalean, Euskadiko zerbitzuetan konpainiako partner baita. Bere itsasbidean, Zeebrugge eta Antwerp (Belgika), Travemünde (Alemania), Helsinki eta Kotka (Finlandia) eta Paldiski (Estonia) portuetan ere egiten du eskala, baita Britainia Handiko, Suediako eta Norvegiako beste portu batzuetan ere (Zeebrugge-n ontzi-aldatuta).
Multipurpose ontziak, salgaiak garraiatzeko moldakortasuna
Finneco ontziei esker, kamioiak eta erdi-atoiak ez ezik, autoak, edukiontziak, era guztietako salgai estatikoak, produktu siderurgikoak eta project cargo (tren- eta haize-industriako piezak) ere ontziratu daitezke, besteak beste.
Zerbitzu honek eskaintzen duen eraginkortasunak eta errepideko garraioaren ordezko iraunkorrak eta errealak, hainbat sektoretako konpainia liderrek Short Sea Shipping ibilbideak hautatzera eraman ditu. Europa iparraldean eta Baltikoan jarduten duten garraio-enpresak; Volkswagen, Seat edo Iveco bezalako autoen fabrikatzaileak eta zuzeneko ekoizleak, hala nola Thyssen edo Euskadiko siderurgia-enpresak, esaterako Sidenor, dira, besteak beste, Taldearen Europako iparraldeko lineen ohiko bezero batzuk. Gainera, Grimaldiko ontziak ere erabateko liderrak dira trenen garraioan, Talgo eta Caf bezalako bezeroekin.
Grimaldi taldeak Bilbon duen presentzia sendotu du
Ontzi eraginkorragoetan egindako inbertsio horri esker, Grimaldi Taldeak sendotu egin du Bilboko portuaren aldeko apustu estrategikoa, eta zerbitzu-ildo horrekiko
interesa berretsi du. Alde horretatik, Errusiaren eta Ukrainaren arteko krisiaren ondorioz San Petersburgoko ibilbideak utzi ondoren, Espainiako iparraldetik zerbitzuak zabaltzeko lanean ari da taldea.
Sebastiano Cirnigliaro Espainiako Grimaldi Taldearen garapen eta logistikako buruak Bilboko portuaren balio estrategikoa eta Finnlines-ek Espainiako iparraldean dituen loturen garrantzia azpimarratu ditu. Gainera, Cirnigliarok adierazi duenez, “merkatuko ontzi modernoenak eta teknologikoenak itsasbide horietan sartzeak, hiru Eco unitate, argi uzten du taldeak itsas garraio gero eta eraginkorrago eta iraunkorragoaren alde egin duela etorkizunean Espainiarekiko ibilbideetan. Ontzi horien ahalmenari eta aldakortasunari esker, linea horretako karga-mix-a osatzen duten segmentu guztietan hazten jarraituko dugu”.
Bestalde, Andima Ormaetxe Portuko Agintaritzako eragiketen zuzendariak nabarmendu duenez, “Grimaldik Bilboren alde egiten duen apustua, beste behin ere, ontzi berri honekin gauzatzen da, Finnlines-ena bezalako linea erregular garrantzitsu eta finkatuan sartzen dena. Europako iparralderantz trafiko handiagoa erakarri eta Portu hau Short Sea-n espezialista gisa finkatzeko edukiera handiagoa izateaz gain, itsasontzi honetan teknologia, berrikuntza eta jasangarritasuna dira nagusi, eta hori bat dator portu berdeagoa izateko gure apustuarekin”.
Grimaldi Taldearen ibilbide jasangarria, apustu estrategikoa
Grimaldi Taldeak jasangarritasunarekin eta bere emisioak murriztearekin duen konpromisoaren esparruan, ontzi-enpresak 1.000 M€ inguru inbertitu ditu hamabi ro-ro eta zazpi car carriers ontziz osatutako flota eraginkor berri batean. Hala, Finnlines-ek merkatuan diharduen garraiatutako unitate bakoitzeko ingurumen-inpaktu txikiena duen itsasoko operadore logistiko gisa finkatzea proposatzen du.
Gainera, Finneco mota zerbitzuan sartzen denean, Finnlines-ek aldez aurretik lortzen ditu NIEren helburuak, 2050erako ezarritako CO2 balioak murrizteari dagokionez. Balio horiekin erabat konprometituta dago Taldea.
