Porturako sarbideaBilboko Portuak 18 milioi tona mugitu ditu urtarriletik ekainera bitartean, iazko epe berean baino 1,6 milioi gehiago, hau da, % 10 inguruko hazkundea. Estatuko Portuen batezbestekoaren gainetik dago (+% 3), eta berretsi egin du Portuaren gorakada, EAEko ekonomia suspertzearekin batera.
Ontziratu gabeko salgai likidoak % 16 hazi dira eta ohiko salgaiak % 11. Edukiontziek % 5 egin dute behera eta solteko solidoek % 2. Oro har, gehien hazten diren salgaiak gasolioa, petrolio gordina, produktu kimikoak, produktu siderurgikoak, mineralak, papera eta pasta dira. Jaitsiera nagusiak gas naturalean; fuel-olioan; olio eta gantzetan; zementuan eta klinkerrean; eta soja-babetan eman dira.
Ibilgailuen trafikoak % 11 egin du gora, eta 550.000 tona baino gehiago. UTIak (garraio intermodaleko unitatea), berriz, % 4 hazi dira. Igoera hori gertatu da, nahiz eta Brittany Ferries enpresak ez duen aurten lehen hiruhilekoan operatu ro-ro arrapala bere ontzi berrien beharretara egokitzeko egin diren egitura-aldaketengatik. Ontzi horiek, hala nola Finnlines-ekoak, edukiera handiagoa dute eta, aldi berean, jasangarriagoak dira.
Fatxadei dagokionez, Europa Atlantikoa da lehena, trafikoaren % 43rekin, eta ondoren Ipar Amerika Atlantikoa, % 16rekin; Hego Amerika Atlantikoa, % 14rekin; eta Asia, % 13rekin, kokatzen dira. Esportatzen eta inportatzen diren hogei herrialde nagusietatik, hamabi Europatik kanpoko herrialdeak dira, eta horrek adierazten du Bilbo zerbitzuak eta trafikoak dituen portua dela, bai distantzia laburretarako, bai Ozeanoan zeharreko ibilbideetarako.
Bestalde, urtarriletik ekainera bitartean, Portuak Zierbenan dituen instalazioetan, Erresuma Batura eta Irlandara doazen 59 ferry egin dute geldialdia, 50.680 bidaiari zeramatzatela, hau da, % 7ko hazkundea. Bestalde, Getxoko gurutzaontzien terminalak 35 gurutzaontzi hartu ditu eta bidaiarien kopurua 54.969koa izan da (+% 14). Guztira, 105.649 pertsona heldu dira ontziz, iazko ekainera arte baino % 10 gehiago.
