Bilboko Portuak 81 gurutzaontzi hartu ditu aurten

Bilboko Portuak urteko azken gurutzaontzia hartu du gaur, Fred Olsen konpainiaren Bolette ontzia, A. Perez eta Cía enpresek kontsignatutakoa, eta 925 bidaiari garraiatzen dituena. Goizeko 8:00etan porturatu da Bilboko Portuko Agintaritzak Getxon dituen instalazioetan, eta bertako bidaiariek, batez ere, txangoak egingo dituzte Donostiara eta Bilbora. Bertan, Bizkaiko hiriburuko gabonetako giroa ezagutzeko eta azoka txikia bisitatzeko aukera izango dute. Horrez gain, Getxoko metro geltokietan geldialdiak egingo dituen doako shuttle zerbitzua eskainiko da egun osoan. Horrez gain, bidaiari askok Bizkaia beren kabuz bisitatzea erabakitzen dute, batez ere Getxoko udalerria.

Bolette gurutzaontzia 20:30ean abiatuko da Liverpoolera. Horrela, Bilboko Portuak apirilaren 5ean hasi zen denboraldia itxiko du. 81 gurutzaontzi jaso ditu aurten, 126 eta 348 metro arteko luzerarekin, eta 140.000 bidaiari ingururekin. Iaz baino gurutzaontzi bat gehiagorekin, zifra errekorra da.

Nazionalitateei dagokienez, gehienak britainiarrak izan dira (% 43,5), eta ondoren ,estatubatuarrak (% 22) eta alemaniarrak (%1 9).

Denboraldian zehar, hamar gurutzaontzi bisitatu dituzte lehen aldiz Euskadi, eta geldialdi gehien dituzten bi konpainiak Carnival (16 gurutzaontzi) eta Royal Caribbean (14) izan dira. Anthem of the Seas, Royal Caribbean konpainiarena, sei geldialdirekin, Bilboko Portua gehien bisitatu duen gurutzaontzia da; ondoren, Aida Cruisesen Aidasol eta Ambassadorren Ambition daude, lau geldialdirekin biak.