125 urte beteko ditu Portugaleteko Burdinazko Kaiak

YouTube: orrialdeetan txertatutako bideoen bistaratzeen jarraipena.
WPML: erabiltzailearen hizkuntza gordetzen du.

Irailaren 12an, 125 urte beteko ditu Portugaleteko Burdinazko Kaiak, burdinazko arkitekturaren eredua, zinez berezia eta ederra baita. Evaristo de Churruca y Brunetek diseinatu zuen kaia, 1887an, eta Portugaleteko zoritxarreko barra deuseztatzean zuen helburu. Izan ere, kezka ugari sortzen zituen harea mugikorreko banku hark: nabigazioa oztopatu egiten zuen Nerbioiko itsasadarraren bokalean, eta istripu eta ontzi-hondoratze asko eragiten zituen.

Kaia eraikitzeak, beraz, aro baten hasiera ekarri zuen Bilboko portuaren historian: Kantauri itsasoko portu arriskutsuenetako bat izatetik Espainiako portu onenetako eta seguruenetako bat izatera aldatu zen.

Kaia eraiki zenetik egin diren birgaitze-obra garrantzitsuenak iaz amaitu zituen Bilboko Portuko Agintaritzak. Inbertsioa 1,63 milioi eurokoa izan zen; lan aipagarrienak, berriz, hauek: 1933an kendutako egiturako elementuak —luzetarako eta zeharkako San Andres gurutzeak— berriro jarri zituzten, bigarren mailako beste elementu batzuk —hala nola zoladurari eusten dion goiko hormigoizko lauza— saneatu egin zituzten, eta baranda aldatu egin zuten.

Urteurrena ospatzeko, erakusketa bat antolatu du Portugaleteko Udalak Salazar Dorrean. Irailaren 12tik urriaren 28ra arte egongo da ikusgai erakusketa.