Porturako sarbideaBilboko Portuko Agintaritzak Bilbao PortLab aurkeztuko du urriaren 20an eta 21ean Bilboko Euskalduna Jauregian egingo den B-Venture ekitaldian. Mahai-inguruetako batean parte hartzeaz gain, “Berrikuntza irekia Bilboko Portuan: guretzat produktu edo zerbitzu bat duen startup bat zara?” tailerrean ere izango da.
Bilbao Port Laben helburua Bilboko Portuan berrikuntza-ekosistema bat sortzea da, barnean sor daitezkeen proiektu berritzaileetan portuko enpresekin lan egiten edo kanpoko proiektu berritzaileak erakarriz. Start-upei, ekintzaileei eta enpresei benetako proba-ingurune bat (living lab) eskaintzen die, prototipoak probatu eta garatzeko, Portuko enpresekin harremanak errazteko, proiektuak garatzeko espazio bat eskaintzeko eta ekintzaileei laguntzeko, horretarako banakako lan-planak eginez.
B-Venture
B-Venture Espainiako iparraldeko ekintzailetza arloko ekitaldirik handiena da, aurten bere bosgarren edizioa ospatzen duena. Hitzaldiak, mahai-inguruak eta ‘startup’ ekosistemaren proposamen teknologiko berritzaileenetako batzuk hartzen ditu. Horrekin batera, bi jardunalditan tailer praktikoak eta networking bilerak egingo dira, berrikuntzari, ekintzailetzari, finantzaketari eta ideiei buruz hitz egiteko.
Antolaketan El Correok parte hartzen du, Eusko Jaurlaritzaren, Bizkaiko Foru Aldundiaren eta Bilboko Udalaren babesarekin, eta Portu Agintaritzaren, Banco Sabadellen BStartupen, BBKren, Laboral Kutxaren, Caixabanken eta Deustuko Unibertsitatearen lankidetzarekin.
Informazio gehiago: https://eus.b-venture.com/
Ekitaldi hau Portuko Agintaritzaren eta Bilboko Portua eta Itsasadarra Fundazioaren Plan Estrategikoaren helburuetan kokatzen da, Bizkaia berrikuntzaren eta digitalizazioaren erreferente bihurtzeko. Arduradunen
esanetan, “Bilbok, Bizkaiko portua eta ardatz atlantikoko portu nagusia, berrikuntzaren eta ekintzailetzaren aldeko apustu honen ikurra eta erakusgarri izan behar du. Hori dela eta, Bilbao PortLab sortu dugu, eta gure start-upak ekimen hau B-Venture-n ezagutzera eta gure portuaren beharretara egokitzen diren proiektuekin hurbiltzera gonbidatzen ditugu”.
Bilboko Portuko lehentasunezko berrikuntza-ardatzak hauek dira:
- Eraginkortasun logistikoa
- Prozesu eta plataforma adimendunen digitalizazioa
- Ingurumen-jasangarritasuna eta energia
- Segurtasuna eta babesa
Bilbao PortLab-ek dagoeneko 4.0 Portuen Funtsaren lehen deialdira aurkezteko interesa duten Bilboko Portuari lotutako 85 proiektu identifikatu ditu. Deialdia uztailaren 27an argitaratu zen, 12 milioi euroan.
