Porturako sarbideaBilboko Portuko Agintaritzak Bilboko Portua ipuin-lehiaketaren lehenengo edizioaren sariak banatu ditu. Lehiaketa 2015/2016 ikasturtean “Ezagutu Portua” programan parte hartu duten ikasleei zuzenduta dago.
Gazteen artean Bilboko Portuarekiko atxikimendua sortzea eta jarduera soziokulturalak eta hezigarriak sustatzea du xede sari horrek. Lan hauek saritu dira:
- Lehen saria: MOHAMED LAGUNTZAILE APARTA, Imke Lázaro Van Spijk (Lauro Ikastola, Loiu)
- Bigarren saria: EL PUERTO, Nora Suso Encinas (Maristas ikastetxea, Bilbo)
- Hirugarren saria: AMAMAREN ISTORIO TXUNDIGARRIA, María Rueda González (Karmengo Ama ikastetxea, Zornotza)
Gaia librea zen, baina baldintza hauetako bat behintzat bete behar zuen: ekintza Bilboko Portuan kokatua izatea; portuko jarduerarekin zerikusia duen lanbide, jarduera edo elementuren bat agertzea; portuan garraiatzen den salgairen bat agertzea; edo bisita gidatuan ikasitako pasadizo edo ikaskizunen bat aipatzea. Epaimahaiak irizpide hauek balioetsi ditu: orijinaltasuna, sormena, hizkeraren aberastasuna, Bilboko portuaren ezagutza eta giza eta gizarte-balioak agertzea.
11.000 ikasle
“Ezagutu Portua” 2013an hasi zen, eta orduz geroztik 11.000 ikaslek bisitatu dute Bilboko Portua. 2016/2017 ikasturterako, dagoeneko ez da lekurik geratzen. Bisitak doakoak dira, eta egunero egiten dira, astelehenetik ostiralera, eskola-egutegiko
egunetan. Ikasgelan lantzen dituzten gaitasunen programan sartzen da jarduera hau. Arlo hauek lantzen dira ikasleekin, besteak beste: historia eta geografia (Bilboko itsasadarraren eta portuaren historia), ontzi-motak (tipologia eta ontzien zatiak), itsas garraioa (garraiobideak, itsas zirkulazioa, lanbide historikoak eta gaur egungoak) eta energia eta ingurumena (energia berriztagarriak, neurketa-tresnak, ingurumen-neurriak).
Helduentzako, unibertsitarioentzako eta LHko ikasleentzako bisitak
2014ko apirilean helduei zabaldu zitzaien programa, eta harrezkero, 3.700 helduk bisitatu dute Portua asteburuetan. Aurten, unibertsitarioentzako eta LHko ikasleentzako bisita gidatuak ere eskaintzen dira astean zehar.
Interesa dutenek aurrez eman behar dute izena ezagutuportua@bilbaoport.eus. helbidera idatziz.
