Bilboko Portuko trafikoa ekainean berreskuratzen hasi da, % 15eko hazkundearekin

Bilboko Portuko trafikoak emaitza positiboak izan zituen ekainean, % 15 inguruko hazkundearekin; horrek esan nahi du ia 350.000 tona berreskuratu direla. Hala eta guztiz ere, eta lehenengo bost hilabeteetako portaera txarra kontuan hartuta, 2021eko lehen seihilekoak oraindik emaitza negatiboa izan du, 1,1 milioi tonako galera metatuarekin. Horrek esan nahi du % 6,6ko jaitsiera izan dela aurreko ekitaldiko aldi beraren aldean.

Beherakada hori, batez ere, solteko gai likidoetan gertatu da (-1,2 milioi tona), eta, zehazki, gordinaren eta gasaren inportazioan; karga lehorrean, berriz, pandemiaren aurreko trafikoak berreskuratu dira, 100.000 tona baino gehiago gora eginez. Nabarmentzekoak dira solteko karga solidoak, % 14,5eko hazkundearekin, eta ibilgailuentzako salgaiak, % 8ko hazkundea izan dutenak, Brexitaren ondorioz bakarrik garraiatutako erdi-atoien zirkulazioa handitu egin delako. Horren ondorioz, armadoreek Irlandarekin eta Erresuma Batuarekin dituzten lineak indartu dituzte.

Emaitza horiek ikusita, bigarren seihilekoan trafikoa nabarmen suspertzea espero da, batez ere hiru arrazoi hauengatik:

Trafiko-jaitsiera handiena 2020ko azken hiruhilekoan gertatu zen. Hilabete horietan ia erdira jaitsi ziren trafikoak, pandemiaren eta zamaketaren grebak izan zituen ondorioen ondorioz.
Karga lehorrak oso bilakaera positiboa izan du, batez ere azken bi hilabeteetan, iazko seihileko bereko trafikoak gaindituz.
Solteko gai likidoei dagokienez, Petronorren findegiak ABBE laster amaitzea eta bi finketa-lerroak uda amaieran ekoizten hastea aurreikusi du. Era berean, gas-eskariaren hazkundea espero da, Bahía Bizkaia Gas (BBG) 3,4 milioi tonaraino iritsi arte.

Merkatuei dagokienez, Errusia, Mexiko, Erresuma Batua, Espainia, Estatu Batuak eta Herbehereekiko trafikoak nabarmentzen dira.

Itsasontzi-kopurua 2020ko ekaineko maila berekoa da, eta linea erregularreko bidaiariak (ferryak) % 55 murriztu dira lehen seihilekoan, pandemiaren murrizketen ondorioz.

Brittanny Ferries ontzi-enpresak ohiko maiztasunak berreskuratu ditu aste honetan, Portsmouthekin ferrya jarri baitu, eta hemendik aurrera datu hori nabarmen hobetzea espero da. Gurutzaontziei dagokienez, udan pandemia hasi ondoren lehena porturatzea espero da.

Negozio-zifra eta finantzaketak

Negozio-zifraren zenbatekoa 31,3 milioikoa izan da; 2020an, berriz, 32,3 milioikoa, hau da, % 3,2ko murrizketa. Milioi bat euro gutxiago fakturatzen da, portuko trafiko-bolumena txikiagoa delako. Susperraldi ekonomikoa 2021eko bigarren seihilekoan kontzentratuko da, eta hilabetekako datuek indarberritze-zeinu argiak ematen dituzte.

Seihilekoaren amaierako banku-zor garbia 11,2 milioi eurokoa da, hau da, 0,35 aldiz Ebitda. 2021eko ekitaldiko lehen seihilekoan beste 10 milioi zor kitatu dira aldez aurretik Europako Inbertsio Bankuan. Beraz, Portuko Agintaritzak zero inguruko zorpetze-profila du. Bere finantza- eta kudeaketa-autonomiari esker, Portuko Agintaritza bere baliabideekin portuko azpiegituren garapena ezartzen ari da.

Lehen seihilekoan sortutako baliabideak (Ebitda) 15,8 milioi eurokoak izan dira.

Bestalde, Bilboko Porturako lortutako diru-laguntzei dagokienez, honako hau azpimarratu behar da:

Portuko Agintaritzak 4,1 milioi euro kobratu ditu Europako Batzordetik, CEF 2015 Connecting Europe Facility laguntza-programaren barruan, Kai-mutur Nagusiko lehen faseko obrari dagozkionak.
Ingurumen-jasangarritasuna ardatz duten proiektuak finantzatuko direla berretsi da, Berreskurapenerako eta Erresilientziarako Mekanismoaren kontura, guztira 12,6 milioi euroan.
- Saneamendu-sarea Kanpoko Abran, I. eta II. faseetan: 7.582.000 €
- Itsasontziei hornidura elektrikoa egitea Kai-mutur Nagusiko A-5 kaian (cold-ironing): 4.340.000 €
- Babes eta Larrialdietako Zentro Integratuaren eraikineko instalazioak eraberritzeko proiektua: 556.000 €
- Ibilgailu elektrikoak kargatzeko puntuak hornitzea eta instalatzea: 86.000 €
- Led teknologiadun argiztapen efizientearen hornidura eta instalazioa ZAD-2n (biltegiratze- eta banaketa-eremua): 72.000 €

Bilboko Portuan berrikuntza-ekosistema bat garatzeko, Bilbao Portlab-en bidez, start-upentzako eta ekintzaileentzako lehen diru-laguntzak lortu dira: 15.000 euroko sei diru-laguntza, 4.0 Portuen Funtsaren ideia-modalitateari dagozkionak, eta 60.000 euroko bi diru-laguntza, Euskadiko Mugikortasun Klusterrarekin lankidetzan Galateari aurkeztutako proiektuetakoak.
Trenbide-eremuan, ADIFek Berreskurapenerako eta Erresilientziarako Mekanismoaren kontura Bilboko Portuarentzat interes berezia duten trenbide-terminaletarako finantziazioa lortu duela berresten da.

51,5 milioi azpiegiturak sortu eta hobetzeko

2021ean Portuko Agintaritzak 51,5 milioi euroko inbertsioa egitea aurreikusten du. Hauek dira obra nagusiak:

AZ1 kaia handitzea, 50.000 metro koadroko azalera eta 251 metro linealeko malguki-linea bat handituz. Obrak 2023aren hasieran amaituta egongo dira, eta ekainean esleitu zaizkio Rover Maritime, Murias eta Ciomar enpresek osatutako aldi baterako enpresa-elkarteari, 27,4 milioi euroan gutxi gorabehera. Irailean hasiko dira eta 18 hilabeteko epea izango dute obrak egiteko.
Kai-mutur Nagusiko lehen faseko 201.399 m2-ko urbanizazioa. Obraren aurrekontua, guztira, 8,5 milioi eurokoa da, eta udazkenean amaituko diren lanen % 35 egin da jada.

Apirilean, Portuko Agintaritzak lehen fase horretako 70.150 m² esleitu zizkion Depósito Toro y Betolazari. Hala, enpresak A6 Kaiko ohiko zamaketarako eta ro-rorako terminala handitu egingo du; 2018ko maiatzean inauguratu zen, eta 110.000 m² inguru ditu. Azalera berrian 5 milioi inguruko inbertsioa egingo du eta 21.600 metro karratuko nabea eraikiko du.

ZAD 2ra ibilgailuentzako sarbide berria. Lan hau otsailean hasi eta urte amaieran bukatuko da. 4,2 milioiko aurrekontua du, eta Bilboko Portuaren Kalerotik sartzeko kontrolean dagoen trafiko-pilaketa arinduko du, Portuko barne-bidetik sarbide zuzena eta bereizia ahalbidetuz.
Larrialdietako kaia, Punta Sollanako dike-kaiaren babesean, merkataritza-kaian porturatzeko murrizketaren bat duten ontziak porturatzeko, hala nola matxura mekanikoak edo antzekoak, segurtasun-baldintzetan nabigatzea eragozten dutenak. Lanek 1,17 milioi euroko aurrekontua dute, martxoan hasi ziren eta urte amaieran bukatuko dira.
Deustuko Kanalaren Ezkerraldeko betelanak. Erakunde arteko hitzarmen berri baten ondorioz, eta 22 hilabete obratan eman ondoren eta 20 milioi inguruko inbertsioa egin ondoren, ekainean amaitu zen proiektu hau. Horri esker, 50.000 m² inguruko azalera sortu da portuko jabari publikoan, eta Zorrotzaurre uhartearen hirigintza-garapena ahalbidetuko du.