Porturako sarbideaHerbehereetako Moerdijk-eko portuko ordezkaritza bat Bilboko Portuko instalazioetan izan da bisitan. Han, Portuko Agintaritzako ordezkariekin bilera egin dute, bi kaien arteko merkataritza-harremanak estutzeko eta horietan sakontzeko. Bi Portu hauen arteko edukiontzien trafikoa handitu egin da 2021eko urtarrilean hasi zen W.E.C. Linesen ontzi-enpresaren konexio berriari esker.
Zerbitzua astero ematen da, irteera eta helmuga egun finkoekin, eta konbinazio gehienak astebeteko epean betetzen dira. Horrela, W.E.C. Linesek salgaiak errepide eta itsasoaren artean aldatzea errazten du logistika fidagarri baten bidez, eta horrek asko lagundu du Bilboko portuko edukiontzien trafikoa areagotzen.
Moerdijk-eko Portuko Agintaritzako CEOak, Ferdinand van den Oever-ek, bisitan adierazi duenez, “Herbehereetako laugarren portu nazionala eta edukiontzien trafikoan bigarrena garenez, altxor ezkutu moduko bat gara askorentzat. Jasangarritasun-maila handiarekin eta zirkulazio-pilaketa txikiarekin, Bilboko Portuarekin kidetasuna dugu, konbinazioa baikara Europako banatzaile logistikoen eta industriaren (gure kasuan, kimika finaren) artean. Gainera, Moerdijk-en soluzio multimodalak eskaintzen ditugu (distantzia laburreko itsas-konexioak, gabarra, tren, errepide eta hodi bidezkoak), eta, horiei esker, interesgune bihurtzen gara hainbatentzat; Europako iparraldeko herrialdeekin, Ingalaterrarekin, Irlandarekin eta Belgika eta Alemaniako barnealdearekin merkataritza-harremanak modu eraginkorrean dituzten edo izan nahi dituztenentzat, besteak beste”.
Bestalde, Bilboko Portuko Agintaritzako operazio, merkataritza, logistika eta estrategia zuzendari Andima Ormaetxek nabarmendu duenez, “portu honen berezitasuna da, Herbehereetako beste toki batzuk bezain ezaguna ez den arren, estrategikoa dela, ongi konektatuta dagoela eta ate garrantzitsua dela Europako iparraldera eta gure hinterlandera iritsi nahi duten kargatzaileentzat. W.E.C. Linesen zerbitzuak hala frogatu du”. Halaber, adierazi du “Bilboko Portuarentzat oso garrantzitsua dela beste portu batzuekin elkarlanean aritzea, lotzen gaituzten itsas-zerbitzuen bidez gero eta korridore eraginkorragoak eta jasangarriagoak eskaintzeko”.
Era berean, W.E.C. Lineseko Bilbao Branch Manager Elsa Conejok adierazi duenez, “ia bi urtez Bilbo bidez Espainia Erresuma Batuarekin eta Europa Kontinentalaren iparraldearekin lotzen aritu ondoren, tren-lotura berriekin hobetzen jarraitzen dugu, eta edukiontzien stocka handitu eta atez ateko irtenbide logistikoak eskaintzen jarraitzen dugu. Gure hub kontinentala Moerdijk-en izateak merkatuetara iristeko aukera ematen digu, ez bakarrik Herbehereetan, baita Belgikan, Frantziako iparraldean, Alemanian, Norvegian… ere. Eskaintzen ditugun eskalek Espainiarako merkatu nagusi horren aukerarik onenetako bat bihurtu gaituzte, eta horren adibide dira Erresuma Batuan, Thamesport-en, dugun eskala zuzena eta Moerdijk-en bidez, Immingham, Teesport eta Blyth-ekoak. Espainiako ekialdeko kostaldea ez ezik, Erdialdeko eta Iparraldeko eremu osoa ere hartu dugu”.
