Porturako sarbideaBilboko Portua proiektu-zaman espezializatuta dago. Nabarmentzekoak dira, bereziki, Bilbao sektore honetarako hub portu bihurtzen duten osagai eolikoak.
2019an, 4.099 pieza berezi jaso zituen Bilboko Portuak. Pisu gehienekoa 500 tonekoa izan zen; luzeena, 70 m-koa; zabalena, 7,5 m-koa; eta altuena, 8 m-koa. Aurten, 2.295 garraio berezi mugitu dira, iazko aldi berean baino % 11 gehiago.
Aipamen berezia merezi dute produktu eolikoek, goranzko joerari eusten baitiote. 2019an 142.000 tona osagai eoliko ontziratu ziren, eta urtarriletik ekainera bitartean 96.711 tona mugitu dira, iazko aldi berean baino % 23 gehiago. Trafiko horretan motorrak, helizeak, palak edo beste edozein euskarri sartzen dira, horietako batzuk puntako enpresak portuko instalazioetan ekoitziak.
Bilboko Portuko Agintaritzak pieza bereziak fabrikatik Portura garraiatzen dituzten erakundeen eta agenteen arteko koordinazioa sustatzen du, bere bezeroen lehiakortasuna ziurtatzeko. Onartutako neurrietako bat N-240 errepidean garraio bereziak aparkatzeko hamaika baztergune eraikitzea da.
Bilboko Portuan proiektu-karga lanetan espezializatutako enpresak daude, baita pieza horiek portuko kaietan bertan egiten dituzten enpresak ere, eta handik edozein helburutara kargatzen dituzte, hala nola Haizea Wind, Lointek, Navacel edo Vicinay Cadenas. Fabrikatzaile eoliko nagusiek – Siemens-Gamesa, Acciona eta Sakana, besteak beste- Bilbao esportazio-hub gisa ere erabiltzen dute
Era berean, euskal bi ingeniaritza handiek (Sener eta Idom) eta egituren eta osagaien fabrikatzaile nagusiek – besteak beste, Haizea Wind eta Navacel – Seapower offshore eolikoaren proiektuan parte hartzen dute. Proiektu honek potentzia handiko (10 MW+) aerosorgailuen belaunaldi berrirako offshore haize-energiaren egitura, dorre eta sistema lagungarrietarako teknologien eta soluzioen ikerketa eta elkarlaneko garapena sustatzen ditu.
2019-2021 aldirako 5,3 milioi euroko aurrekontua du, eta Eusko Jaurlaritzaren Hazitek Programak finantzatzen du, Eskualde Garapeneko Europako Funtsaren laguntzarekin.
Wind Europe Ports-eko kideak
Energia eolikoaren garapenak eskaintzen dituen aukera berriak ezagutzeko eta beste portu lider eta operadore batzuekin harremanetan egoteko, Portuko Agintaritza Wind Europe Ports Platform-i atxikita dago, eta jasangarritasun eta
eraginkortasun energetiko handiena bilatzen duten zenbait proiektutan parte hartzen du eta proiektu horiei laguntzen die.
Energiaren Nazioarteko Agentziaren (ENA) arabera, itsasoko merkatu eolikoa 15 aldiz biderkatuko da 2040 arte, eta bilioi bat dolarreko inbertsioa lortuko du, hidrokarburoen ez-konbentzionalen eta eguzki-energia fotovoltaikoaren antzeko energia-iraultza eragingo du.
Europako Batzordeak Bidezko Trantsizio Funtsaren aurrekontua 37.500 milioi eurora igotzea (7.500 milioi eurorekin alderatuta), proposatu du, EBko Berreskuratze Planaren barruan.
Espainiako Gobernuak, bestalde, Errege Lege Dekretu bat onartu zuen ekainean, % 100 berriztagarria den sistema elektriko baterako trantsizio energetikoa modu ordenatuan eta azkarrean bultzatzeko eta ekonomia suspertzen laguntzeko neurri sorta batekin, Europako Itun Berdearekin bat etorriz. Arauak iturri berriztagarrien hedapen masiborako oztopoak kentzen ditu, negozio-eredu berriak definitzen ditu eta eraginkortasun energetikoa sustatzen du, besteak beste. Horrekin, eta COVID-19 amaitu osteko indarberritze-testuinguruan, Espainiak enplegua sortzeari eta jarduera ekonomikoari dagokienez duen potentziala aprobetxatzeko aukera emango dion esparru egonkor bat ezarri da, trantsizio energetiko garbi, zuzen, fidagarri eta ekonomikoki lehiakorrari lotuta. Aldi berean, esparru horrek elektrizitatearen faktura murrizteko aukera emango du, energia berriztagarriak baitira sorkuntza-iturri merkeena.
