Porturako sarbideaPortu Agintaritzak eta Santurtziko Udalak sinatutako hitzarmenari esker gauzatuko da ekintza.
Pasabide berriak zabalera handiagoa izango du oinezkoentzat, eta irisgarritasuna hobetuko duten bi igogailu izango ditu.
Bilboko Portuko Agintaritzak eta Santurtziko Udalak portuaren eta hiriaren arteko elkarreraginean eremuan jarduketak garatzeko egin duten lankidetza-hitzarmenaren ondorioz, Portuko Agintaritzak Murrieta etorbidearen eta Victoria Eugenia Erregina pasealekuaren artean dagoen oinezkoentzako pasabidea eraisteko eta, ondoren, berreraikitzeko obrak hasi ditu.
Gaur egungo pasabideak ez ditu betetzen irisgarritasun-irizpideak, ezta ADIFen indarreko araudia ere; beraz, hitzarmenak aurreikusten zuen obra nagusietako bat da. Obraren aurrekontua, lehiaketa publikoan Cycasari esleitua, 1,85 milioi eurokoa da eta gauzatzeko epea sei hilabetekoa.
Egungo pasabidea eraitsi ondoren, 55,72 m-ko luzerako metalezko egitura izango duen pasabide berria egingo da, bi baotan banatuta, eta sarbideetan eskailerak eta igogailu irisgarri alternatiboak jarriko dira.
Pasabide berriaren kokapena bat etorriko da gaur egun dagoenarekin, eta diseinuak hobetu egingo du eremuko oinezkoen joan-etorria; izan ere, indarrean dagoen araudian ezarritako zehaztapenak betetzen dituenez, oinezko guztiek erabili ahal izango dute, baita mugikortasun urriko pertsonek ere. Gainera, pasabideari zabalera handiagoa emango zaio, ADIFek eskatutako araudia betez.
Pasabide berria, korten altzairuzko egitura metalikoz egindakoa, Murrieta etorbidetik abiatuko da 12,80 kotan eta Victoria Eugenia Erreginaren pasealekura iritsiko da 11,96 metroko kotan, % 1,5eko maldarekin jaitsiz. Pasabideak Santurtziko Parkea kalea eta Santurtziko geltokiaren irteeran dauden FFCCko lau bide zeharkatzen ditu. Pasabideak lehengoak zuen irisgarritasuna hobetu eta irisgarritasunari buruzko araudia betetzen du, 2,50 metroko zabalera librea baitu.
Victoria Erreginaren pasealekuaren aldean 17,5m x 6,3m-ko azalera horizontala sortuko da. Azalera horrek pasabidearen taula igogailuarekin eta eskailerekin lotzeko ez ezik, puntu horretatik itsasadarrerako begiratoki gisa erabiltzeko eta pasealekuaren zati hori estaltzeko ere balioko du.
Santurtzi Parkea kaletik sartzeko hormigoizko eta Victoria Erreginaren Pasealekura iristeko metalezko eskailerak proiektatu dira 2 metroko zabalerakoak, eta igogailu irisgarri alternatiboak.
Ricardo Barkala Portuko Agintaritzako presidenteak adierazi duenez, egin beharreko izapideak egin ondoren, “egia bihurtu da, azkenean, pasabide berriaren obren hasiera, Santurtzirekin eta bertako bizilagunekin dugun konpromisoaren froga”. Portu Agintaritzak hitzarmen bidez gauzatuko ditu proiektu horiek eta gainerako proiektuak, “baina betiere udalaren
oniritziarekin eta aholkularitzarekin, ezin baita bestela izan. Elkarrekin lan egingo dugu irisgarritasuna eta segurtasuna modernizatzearen, konpontzearen eta hobetzearen alde, eta herritarren erabilera jasangarriak eta elkarguneak sustatzearen alde, espazio horiek portu-instalazioekin batera bizitzea bilatuz. Azken batean, Santurtziko bizi-kalitatea hobetzen lagunduko dugu”.
Bestalde, Aintzane Urkijo Santurtziko alkateak adierazi duenez, ekintza horri esker, “santurtziarrek egunerokoan erabiltzen duten pasabide horri irisgarritasun handiagoa eta sarbide hobea emango zaio. Guztiok erabili ezin genuen sarbide horren arazoa konponduko dugu, egitura modernoagoa eta, batez ere, irisgarriagoa emanez. Ekintza horrekin batera, dagoeneko egin diren beste ekintza batzuk ere burutu dira, hala nola pasealekuko bizikleta-bidea eta gauzatzen joango diren beste batzuk”.
Era berean, prentsaurrekoan, Urkijok “Portu Agintaritzaren inbertsio ahalegina eskertu du. Izan ere, pixkanaka, proiektu desberdinetan gauzatuko dena, hala nola gaur aurkezten duguna, gure bizilagunen bizi-kalitatea hobetzeko”.
Azken hitzarmenaren eremua
Portuko Agintaritzaren eta Santurtziko Udalaren arteko lankidetza udalerri horretako portu-instalazioen jatorriari eta garapenari buruzkoa da. Horri esker, hainbat hirigintza-proiektu eta -jarduera gauzatu dira, itsas-pasealekuak sortu dira, sarbide eta bide publikoak ezarri dira, eta udalerriko biztanleentzako jolas-eremu berriak berreskuratu eta ireki dira.
2022ko maiatzean sinatutako azken akordioak lau urteko indarraldia du, eta udalerriaren irisgarritasuna lortu nahi du, batez ere, bai eta hiritarrentzako erabilera ludikoa, publikoa eta aisialdikoa duten bideen, espazio publikoen eta hiri-portu ingurunearen baldintzak hobetzea ere, hala nola pasealekuak, bideak, bidegorriak, oinezkoentzako pasabideak edo igogailuak.
